الجمعة، 25 يونيو 2010

وطني حبيبي ... راح فين؟ دلوني عليه


كانت أول معلومات عرفتها عن حياة الزعيم الخالد مصطفى كامل كان من مسلسل قاسم أمين وإلي بين قد ايه الراجل ده كان عظيم وافنى حياته في سبيل الوطن واحرق زهرة شبابه من أجل يضئ للشعب المصري طريق الحرية والاستقلال.

مصطفى كامل الشاب الكاتب العبقري، الخطيب الذي اثار بكلماته نفوس المصريين والعالم أجمع، شاب بدأت زعامته عندما كان عمره 21 سنة!

شاب لم تغره متع الحياة من أموال ولا نساء.

مصطفى كامل لم يتزوج ... ولكن الآن غيره الكثيرون ليس لهم وظيفة في الحياة غير الزواج (اتنين وثلاثة واربعة لانهم فاضين، وطبعا سيبك من موضوع انهم مشغلوين بقضية دينهم ووطنهم الاسلامي لانهم لو مشغلوين بأي قضية مش هيفكروا غير فيها ومش هيفضلوا مشغلوين بارضاء نصفهم التحتاني فقط).

مصطفى كامل تواجد في زمن تواجد فيه العديد من العظماء واعتقد ان هذه الفترة من تاريخ مصر على الرغم من الاحتلال الانجليزي كانت اعظم فترة تاريخية لمصر والمصريين.

لانها كانت بداية فترة التنوير ووضع اسس التعليم والثورة الحقيقية للمصريين، ثورة لكل المصريين مش مجرد انقلاب عسكري لضباط جيش وبقية الشعب مأنتخ.

مصطفى كامل الشاب تواجد مع العديد من النماذج التي تحتاج مصر الآن لتواجدها، الامام محمد عبده، عبد الله النديم، محمد فريد، سعد زغلول، أحمد لطفي السيد، قاسم أمين، فتحي زغلول.

ومهما كانت هناك انتقاد لبعض هؤلاء أو كلهم ... فهم عظماء ... وأكيد أحسن من الانتيكات بتوع زمنا ده!

هذا العصر ... عصر شباب مصر الحقيقيون

شباب كانوا روادا في الثورة

شباب كانوا رواد فكر

شباب كانوا رواد في الترجمة

شباب كانوا رواد في وضع اسس التعليم الجامعي


شباب ماتكلمش كتير وقال اهدافنا كذا وكذا وكذا ... وفي الآخر بخ

كان الهدف ... مصر

كان الهدف ... العمل من أجل مصر

كان الهدف ... التضحية من أجل الجهد والمال من أجل مصر



ماقولوش بقى تعالوا نبلور الشكل الايدلوجي للتعبير المنبثق للحركة السياسية المنفتحة من خلال مفاهيم غير مفهومة ماشربش الشاي أشرب ازوزة أنا



وعلشان زمنهم غير زمانا ... محدش قال عليهم قصر سياسيا ولا لسه بدري عليهم ... لأن كان زمنهم زمن عمل وتضحية ومكنش في وقت للكلام.

مصطفى كامل مات شابا ... مضحيا بحياته

محمد فريد الثري ابن الاكابر ... مات فقيرا وحيدا بعد أن انفق كل امواله في سبيل مصر... حتى أن أحد الاثرياء المصرين تولى عملية رجوع جثمانه من اوروبا ودفنه في مصر

آه يازمن



مصطفى كامل انشئ الحزب الوطني من أجل تحقيق جلاء الاستعمار الانجليزي عن مصر، وكان اسما على مسمى فانه كان حزب وطني انشاؤه وطنيون من أجل كل الوطنيون (مكنش من اجلك انت ... طبعا عارفين "انت" ده مين).

دول شباب مصر ... إلي نورا مصر




ودارت الأيام ... ويحصل تقلابات سياسية وعسكرية ... المهم بدون تفاصيل ... ينشئ الرئيس محمد أنور السادات الحزب الوطني الديمقراطي وإلي حاليا أي حد مش هيكون عضو في الحزب الوطني، مستحيل يكون مسئول أو قيادي في البلد ولا وزير ولا أي حاجة خالص.

وطبعا أي حد مش في الحزب الوطني عايز يبقى سياسي أو يشارك في الحاية السياسية لازم يتقال عليه انه قاصر سياسيا.

نشوف بقى مين ضحى بحياته او فلوسه دلوقتي؟؟

والنبي إلي يعرف ... يقولي

أنا إلي اعرفهم إلي قلبوا البلد ونهبوا خيرها ونهبوا اهلها كمان

طيب بالنسبة للشباب وكدة؟ وكل المصريين الصراحة إلي كانوا بيموتوا فداء لمصر ... دلوقتي مصر بتقتل فيهم!

 

آه ... اتفرج عليهم اهو





وطبعا إلي يقول
لأ ... كفاية ... مش قادرين ... بجد كدة كتير
يتحصار ويضرب وممكن يموت ويتسحل برضة ... عادي

ويبقى مصيرة كدة




وطبعا طبعا لأن منتخب مصر كويس زي ماقال الريس ... بس بقية الشعب مش كويس ياريس ... والله ماهو كويس ... بلاش احلف بربنا علشان مش هيأثر فيك ... تحب احلفلك بامريكا؟ علشان خلاص مابقاش حد عارف ربنا ولا بيخاف من ربنا



شوف فرق الهتاف

استغفر الله العظيم




دول إلي قتلوا شباب مصر والمصريين ... وباعوا مصر وخربوها





ياخسارة دم ولادك يابلدي طول السنين
افتكر أن علمنا لازم يبقى كدة

الأحد، 13 يونيو 2010

ارنستو تشي جيفارا

المحررين لا وجود لهم؛ فالشعوب وحدها هي التي تحرر نفسها

بهذه الجملة ابدأ كلامي عن المناضل الثوري العالمي الشاب الوسيم
ارنستو تشي جيفارا
14 يونيو 1928 - 9 أكتوبر 1967


الأسم
إرنستو رافاييل جيفارا دِلاسيرنا
Ernesto Rafael Guevara de la Serna‏

اللقب
تشي جيفارا
Che Guevara

اليكم لمحات عن حياة قصيرة مليئة بالمواقف والبطولات لرمز الثوار في العالم
ارنستو تشي جيفارا

في 14 يونيو 1928 ولد جيفارا في روزاريو (الأرجنتين) في أسرة غنية. أصيب بالربو منذ طفولته ولازمه المرض طوال حياته. التحق بكلية الطب جامعة بوينس آيرس في عام 1945.
في عام 1949 خرج في رحلة يستكشف الأرجنتين الشّماليّة على درّاجة، و للمرّة الأولى يقابل فيها الطبقة الكادحة الفقيرة وقرر الخروج مرة اخرى عام 1951 في رحلة طويلة وطاف قبيل تخرجه معظم دول أمريكا الجنوبية على دراجة النارية، فزار إضافة لبلده الأرجنتين، تشيلي وبوليفيا وكولومبيا والإكوادور وبيرو وبنما وعايش معاناة الفلاحين والطبقة الكادحة من العمال وفهم طبيعة الاستغلال الذي يعانيه شعوب الدول المضطهدة وكيف يستغل الرأسمالي حاجة الفقراء ويخضعهم تحت تصرفهم.

تخرج في كلية الطب عام 1953 ولكنه لم يلحتق بالخدمة العسكرية نظرا لانه مصاب بالربو.

في عام 1954 توقف في غواتيمالا التي كانت تشهد غليانا ديمقراطيا وشارك تشي في مقاومة الانقلاب العسكري الذي دبرته المخابرات الأمريكية.
في عام 1955 قابل جيفارا المناضلة اليسارية "هيلدا أكوستا" من "بيرو" في منفاها في جواتيمالا، فتزوجها وأنجب منها طفلته الأولى، وهيلدا هي التي جعلته يقرأ للمرة الأولى بعض الكلاسيكيات الماركسية، إضافة إلى لينين وتروتسكي وماو تسي تونغ.
التحق آنذاك بالمكسيك. وهناك تعرف في يوليو 1955 على فيديل كاسترو. وجنده كاسترو طبيبا في البعثة التي ستحرر كوبا من ديكتاتورية باتيستا. وهناك سمي بتشي ومعناها "رفيق السلاح". وتزوج من زوجته الثانية "إليدا مارش"، وأنجب منها أربعة أبناء بعد أن طلّق زوجته الأولى.
في الأول من يناير من عام 1959 انتصرت ثورة فيديل كاسترو في كوبا. انتشر الآلاف في شوارع هافانا لاستقبال أبطال الاشتراكية، الذين أطاحوا بالنظام العسكري الفاسد الذي تدعمه أمريكا.

بعدها صدر قانون يعطي الجنسية والمواطنية الكاملة لكل من حارب مع الثوار برتبة عقيد، ولم توجد هذه المواصفات سوى في جيفارا الذي عيّن مديرا للمصرف المركزي. بعد استقرار الأمور قامت الحكومة الشيوعية التي أصبح فيها جيفارا وزيراً للصناعة وممثلاً لكوبا في الخارج ومتحدثاً باسمها في الأمم المتحدة.



تولى جيفارا بعد استقرار الحكومة الثورية الجديدة على التوالي، وأحيانا في نفس الوقت المناصب التالية:
     - سفير منتدب إلى الهيئات الدولية الكبرى.
     - منظم الميليشيا.
     - رئيس البنك المركزي.
     - مسئول التخطيط.
     - وزير الصناعة.



تخطت أحلام هذا الشاب الأرجنتيني الثائر حدود جزيرة كوبا، فقد كان يحلم بعولمة ثورته، انطلاقا من أمريكا اللاتينية. أراد رفع علم المساواة في العالم أجمع.


لم يرتح جيفارا للحياة السياسية فاختفى، في أكتوبر 1965 أرسل جيفارا رسالة إلى كاسترو تخلى فيها نهائيا عن مسؤولياته في قيادة الحزب، وعن منصبه كوزير، وعن رتبته كقائد، وعن وضعه ككوبي، إلا أنه أعلن عن أن هناك روابط طبيعة أخرى لا يمكن القضاء عليها بالأوراق الرسمية، كما عبر عن حبه العميق لكاسترو ولكوبا، وحنينه لأيام النضال المشترك.
أكدت هذه الرسالة إصراره على عدم العودة إلى كوبا بصفة رسمية، بل كثائر يبحث عن ملاذ آمن بين الحين والآخر. ثم أوقف مساعيه الثورية في الكونغو وأخذ الثائر فيه يبحث عن قضية عالمية أخرى.

ومرة آخرى يتخلى جيفارا عن الحياة الرغدة ويسافر في عام 1965 إلى الكونغو وسعى لإقامة مجموعات حرب عصابات فيها ومع أن فكرته لم تلق صدى واسعا لدى بعض القادة، أصر جيفارا على موقفه. ذهب جيفارا لأفريقيا مسانداً للثورات التحررية، قائدا لـ 125 كوبيا، ولكنه فشل في تحقيق هدفه في الكونغو. 
قد زار جيفارا مصر عام 1965 والتقى بعبد الناصر والذي تجمعت فيهم بعض الصفات ومنها الخروج عن اطار المحلية في الدفاع عن قضايا التحرير واختار جيفارا والبعثة الكوبية مصر لانها كنت تدعم ثورات التحرير العربية والافريقية في ذلك الوقت.






وهذا جزء من الحوار الذي دار بين عبد الناصر وتشي جيفارا
عبد الناصر: ما بك يا تشي
تشي: انتصرت الثورة في كوبا، بدأنا في تحقيق ما كنت احلم به، ولكن، ليس طموحي ان انشأ المصانع في كوبا، ولا ان اتسلم وزارات ولا مسؤوليات فيها، انا احلم في الثورة الكبرى، احلم بالاممية ان تتحقق، احلم بانتصار الخير على الشر، احلم بغد الاممية يوحد البشر..
عبدالناصر: وماذا بعد؟
تشي: قصدتك لاستشيرك بعد خيبتي في الكونغو.
عبد الناصر مقاطعا: انت رجل ابيض ... هناك مفهوم الظلم مختلف ... الظلم قائم على الابيض والاسود.
تشي: فكرت في ان اذهب الى بوليفيا .. هناك يمكن ان نطلق ثورتنا العالمية.. يمكن ان تكون الشرارة.. في الثورة اجد نفسي.
عبد الناصر: ما قلته رائع، ولكن، دعني اقرب لك الصورة.. الثورة جميلة، شبهها بعلاقة بين رجل وامرأة، التعارف في البداية، المغامرات ثم الخطوبة، كلها مراحل جميلة، لا يوجد فيها مسؤوليات، نعيش هيام الحب، نحب الثورة، نحب التمرد، الى ان نصل الى الزواج، الزواج مسؤولية وجدّ.. انت تريد فقط من الثورة ما هو قبل الزواج.



لكنه فجأة ظهر في بوليفيا قائدا لثورة جديدة، ولم يوثق هذه المرحلة سوى رسائله لفيديل كاسترو الذي لم ينقطع الاتصال معه حتى أيامه الأخيرة.
لم يكن هدف جيفارا خلق حركة مسلحة بوليفية، بل التحضير لرص صفوف الحركات التحررية في أمريكا اللاتينية لمجابهة النزعة الأمريكية المستغلة لثروات دول القارة. منذ بداية عام 1967 وجد جيفارا نفسه مع مقاتليه العشرين، وحيداً يواجه وحدات الجيش المدججة بالسلاح بقيادة السي أي إيه في براري بوليفيا الاستوائية. أراد جيفارا أن يمضي بعض الوقت في حشد القوى والعمل على تجنيد الفلاحين والهنود الحمر من حوله، ولكنه أجبر على خوض المعارك مبكراً.
في يوم 8 أكتوبر 1967 وفي أحد وديان بوليفيا الضيقة هاجمت قوات الجيش البوليفي المكونة من 1500 فرد مجموعة جيفارا المكونة من 16 فرداً، وقد ظل جيفارا ورفاقه يقاتلون 6 ساعات كاملة وهو شيء نادر الحدوث في حرب العصابات في منطقة صخرية وعرة وخلالها تعرض جيفارا إلى أزمات ربو حادة، مما ساهم في تسهيل البحث عنه ومطاردته.
 
وقد استمر "تشي" في القتال حتى بعد موت جميع أفراد المجموعة رغم إصابته بجروح في ساقه إلى أن دُمّرت بندقيته وضاع مخزن مسدسه وهو مايفسر وقوعه في الأسر حياً. نُقل جيفارا إلى قرية "لاهيجيرا"، وبقي حياً لمدة 24 ساعة. وبعدها نفذ الضابط "ماريو تيران" التعليمات بإطلاق النار على "تشي".


دخل ماريو عليه متردداً فقال له "تشي": أطلق النار، لا تخف؛ إنك ببساطة ستقتل مجرد رجل"، لكنه تراجع، ثم عاد مرة أخرى بعد أن كرر الضابطان الأوامر له فأخذ يطلق الرصاص من أعلى إلى أسفل تحت الخصر حيث كانت الأوامر واضحة بعدم توجيه النيران إلى القلب أو الرأس حتى تطول فترة احتضاره، إلى أن قام رقيب ثمل بإطلاق رصاصه من مسدسه في الجانب الأيسر فأنهى حياته.

وقد رفضت السلطات البوليفية تسليم جثته لأخيه أو حتى تعريف أحد بمكانه أو بمقبرته حتى لا تكون مزاراً للثوار من كل أنحاء العالم.
ومن المعروف أن أيدي تشي جيفارا بُترت من أجل التعرٌف على بصمات أيديه. في العام 1997م كشف النقاب عن جثمانه وأعيد إلى كوبا، حيث قام الرئيس الكوبي السابق فيدل كاسترو بدفنة بصفة رسمية.


دي القصيدة إلي كتبها الشاعر أحمد فؤاد نجم بعد مقتل ارنستو تشي جيفارا

جيفارا مات ... جيفارا مات ... جيفارا مات
آخر خبر فـ الراديوهات
و فـ الكنايس
والجوامع
و فـ الحواري
والشوارع

و ع القهاوي وع البارات
جيفارا مات
جيفارا مات
و اتمد حبل الدردشة والتعليقات

مات المناضل المثال
يا ميت خسارة ع الرجال
مات الجدع فوق مدفعه جوة الغابات
جسد نضاله بمصرعه
و من سكات
لا طبالين يفرقعوا
ولا اعلانات

ما رأيكم دام عزكم
يا انتيكات
يا غرقانين
فـ الماكولات والملبوسات
يا دفيانين
ومولعين الدفايات
يا محفلطين
يا ملمعين ياجميسنات

يا بتوع نضال آخر زمن
فـ العوامات
ما رأيكم دام عزكم

جيفارا مات
لا طنطنة
و لا شنشنة
و لا اعلامات واستعلامات

عيني عليه ساعة القضا
من غير رفاقة تودعه
يطلع أنينه للفضا
يزعق ولا مين يسمعه
يمكن صرخ من الألم
من لسعة النا ف الحشا

يمكن ضحك
 أو ابتسم
أو انتشى
يمكن لفظ آخر نفس كلمة وداع
لجل الجياع
يمكن وصية للي حاضنين القضية
بالصراع
صور كثير ملو الخيال
و ألف مليون احتمال
لكن أكيد و لا جدال
جيفارا مات موتة رجال

ياشغالين ومحرومين
يا مسلسلين
رجلين و راس
خلاص خلاص
ما لكوش خلاص
غير بالبنادق والرصاص
دا منطق العصر السعيد
عصرالزنوج والأمريكان
الكلمة للنار والحديد
و العدل اخرس أو جبان
صرخة جيفارا يا عبيد
في أي موطن أو مكان
ما فيش بديل
ما فيش مناص
يا تجهزو جيش الخلاص
يا تقولو ع العالم
خلاص


طبعا دي كانت من تلحين وغناء الشيخ إمام وإلي لحنها بعد كدة بقى هو هو لحن نشيد "ياجمال ياحبيب الملايين" بعد رحيل جمل عبد الناصر.

ولكن الحقيقة أن جيفارا عاش

ما رأيكم دام عزكم
يا انتيكات
يا غرقانين
فـ الماكولات والملبوسات
يا دفيانين
ومولعين الدفايات

وبرغم إختلافنا الفكري والعقائدي مع "جيفارا" إلا أننا لا نملك إلا أن نحترمه لأن مثل هذا الرجل الذي أفنى عمره من أجل أن تتنفس الشعوب نسيم الحرية،والذي عزفت نفسه عن الراحة والسلطة والوزارة والمال فقط لينصر حرية شعوب تختلف معه في الدين واللغة والوطن. وكل ذلك خير دليل على أنه لم يرغب في شئ لنفسه. مات من أجل الحرية.


حرية لغيره ولن ينال منها شئ!!


فأين من هم يتكلمون لغتنا... ويعتنقون ديننا..ومن أبناء وطننا ... ويحرموننا حريتنا وينتهكون كرامتنا؟؟

إين أنتم يامن تسبون جيفارا وتهاجمنوه لأنه شيوعي ماركسي ملحد ولكنه عزف عن كل ملزات الحياة واختار أن يبقى في الغابات وفي الصحراء الجرداء يحارب ويناضل هنا وهناك من أجل الحرية.
نعم لدينا العديد من النماذج لنفخر بها وتاريخنا ملئ بها، ولكنها تاريخ!


جيفارا هو رمز الثورة على الظلم الوحيد في العصر الحديث. والجميع مبهرون به لأنه ببساطة ترك الحياة الرغدة التي كان يعيشها وفضل أن يكون ثائرا على الظلم وعلى الاستعمار. وترك المناصب والسلطة والنفوذ مرة آخرى ويفضل أن يناضل وسط الغابات والصحاري الجرداء من أجل تحرير الانسانية.

جيفارا أثبت أن الثورة ممكنة، أثبت أن الثورة من الممكن أن تكون عالمية ده الظلم الهيمنة (الهيمنة الامريكية التي كانت عدوه الأول). أثبت جيفارا الشيوعي الملحد أن الظلم يجب أن تقوم ثورة من أجل رفع الظلم، ولكن نحن لانعرف غير "الأنتخة".


كل الهجوم على جيفارا ماهو إلا غيرة لاطلاق صفة مناضل عليه، وللاسف هذا الهجوم وجدته فقط من بعض شيوخ الاسلام. فمن يغار من جيفارا أو يجده شخص لا يصح أن نعجب به فإنني ارجوه أن يقوم بربع ماقام به جيفارا في 13 عاما (العمر النضالي لجيفارا) لنرى إذا كان جيفارا لايستحق كل هذا الاعجاب والتقدير؟

وفي النهاية فأنني اتمنى أن أموت مثل جيفارا ... موتة رجال

أختم كلامي بنفس الجملة التي بدات بها عن المناضل الثوري العالمي الشاب الوسيم
ارنستو تشي جيفارا

المحررين لا وجود لهم؛ فالشعوب وحدها هي التي تحرر نفسها

السبت، 5 يونيو 2010

السر (قانون الانجذاب)

من فترة صغيرة شفت فيديو بعنوان "The Secret" أو "Attraction Law" والحقيقة الفيديو كان غريب جدا أو بمعنى آخر ابهرني وشد انتباهي وكان باختصار السر ده أو سر الكون زي مااطلق عليه؛ هو أن الحاجة إلي الانسان بيفكر فيها، فالحاجة دي بتحصله.

فيديو اكيد يشد الانتباه والتركيز لأن صناع الفيديو شبهوا السر ده بالجني إلي بيخرج من مصباح علاء الدين وبيحقق كل الامنيات وأن الانسان كل إلي عليه هو التمنى وساعتها كل الظروف المحطية بيه هتبدأ في التغير من أجل تحقيق الامنية دي.

أنا مش باتكلم النهاردة في الموضوع ده علشان اتكلم في قانون الجذب أو سر الكون لأني شايفة مش سر أو مش حاجة جديدة.

هل فعلا الواحد لما بيفكر في شئ أو هدف ... الهدف ده بيتحقق؟

يعني لو تمنيت إني أكون مثلا قائد عظيم وأغير العالم وأعمل إلي جيفارا معرفش يعمله ... هل ده هيتحقق؟
هل لو تمنيت إني اموت موتة مشرفة زي استشهاد السادات مثلا ... هل ده هيتحقق؟
هل لو تمنيت إن يكون مرتبي أعلى من أي خواجة لمجرد إنه خواجة ... هل ده هيتحقق؟


قانون الانجذاب أو السر بيقول آه ... هيتحقق ... لأن زي ما الوحد بيفكر في شئ فإن الشيء ده بينجذبله وهي دي الفكرة.

أكيد خلال بعض الكلام اتقال حاجات مخالفة للشرع أو يعني أقدر أقول عليها غير مستحبة إنها تتقال.

طبعا لو واحد مش بيقدر يوزن أموره أو يفكر في الشيء كويس ... ممكن مجرد إنه يسمع عن قانون الانجذاب ... هيفضل ليل نهار يحلم ويفكر لحد لما يتجنن.

ويمكن هنا نقطة خلافي ونقطة خلاف بعض العلماء وبرضة نقطة خلافي معاهم.

أكيد لما يكون فيلم "السر" حاصل على نسبة مشاهدة عالية جدا وكتاب السر يكون أعلى نسبة توزيع عالمية ... أكيد لازم يكون سر في السر.

مش سر ولا حاجة ... ولكن أكيد لما حد هيجي يقول إنه عنده سر الكون وإلي هيخليك تحقق كل امنياتك أكيد هتسمعه وهتجري وراه كمان.
أنا هابدأ الأول برأي بعض العلماء (علماء الدين) وإلي طبعا رافضين موضوع السر ده بتاتا ... وإن مفيش حاجة اسمها كدة ... وبدون الدخول في تفاصيل لأان الموضوع ده في كتب نقدية كتير ولكن هاتكلم باختصار.

طبعا في البداية العلماء رافضين موضوع التمني أو احلم وشايفين إن كدة الواحد يقعد من غير شغل ويتمنى بقى وكل حاجة تيجي لحد عنده

شايفين برضة إن في تجاهل للقدر وإن في قدر ربنا وإلي مستحيل حد يقدر يغيره

وغيرها من الاشياء إلي شايفينها خرافات وادعائات

طبعا أنا معاهم ولكن مش معاهم في إن النقد مش موضوعي أو يعني النقد هدم الموضوع من اساسه وافترض إنه ادعاء وخلاص وكل واحد يشوف مصلحته.

رغم إن المفاجأة إن السر ده أو قانون الانجذاب جاب نتيجة مع ناس كتير ويمكن معايا أنا شخصيا قبل ماعرف موضوع السر ده اصلا وكنت باستعجب من أن تفكيري في ئيء معين بيحصل في حالات كتيرة.

وأكيد لو كان الفيلم أو الكتاب غير مجدي ومجرد ادعاء ونصب ... كان الموضوع انتشهر وكل العكس هو الصحيح.

كنت اتمنى من العلماء إلي نقدوا الموضوع إنهم يفسروا ليه ده بيحصل أو على أساس ظهرت ظاهرة السر؟

ولكن أنا احب إني أقول رأي في تفسي موضوع السر أو قانون الانجذاب.

قانون الانجذاب ببساطة هو الارادة البشرية والقدرة على تحديد هدف والسعي وراه.

قانون الانجذاب بيفترض أن الواحد لما بيفكر في شيء ... الشيء ده بيحصله أو بيجيله.

ولكن الحقيقة إن الاشياء دي أهداف ثابتة والانسان هو إلي بيتحرك اتجاهها وبيحاول تحقيقها.


وده ببساطة هو التفسير (من وجهة نظري)

يمكن موضوع إن العلماء قالوا الواحد يقعد من غير شغل بقى ويتمنى بقى وكل حاجة تيجي لحد عنده. ده مش صحيح ومفيش أي مثال من إلي اتعرض في فيلم السر جاب نموذج بالشكل ده بل إن الفيلم كان واضح جدا إن تفسير السر ده هو الارادة مع وجودة ارادة القدر وتحكمه.
مثلا ... مثال الراجل إلي كان عايز يكسب 100000دولار خلال الشهر الجاي. الراجل ده ماكسبهمش كدة ولا صحى من النوم لاقهم قدامه، ولكن ببساطة تركيزه على الهدف خلى مخه يركز على الهدف ويفكر في استغلال كل شيء حواليه لحد لما وصل بتفكيره إنه كان كاتب رواية (مجرد هواية) وفكر إنه لو طبعها وباعها ... ممكن يحقق امنيته بسهولة.
ونوصل من هنا للحقيقة العلمية المعروفة بإن الانسان بيستغل فقط 5% من قدرات عقله ولكن الشخص ده لما ركز على هدف فإنه سخر كل قدراته للتفكير في كيفية تحقيق امنيته وهو ده السر ... الارادة والسعي واء الهدف.
طبعا أنا قلت مع وجود ارادة القدر وتحكمه وده ظهر في إن الشخص ده ماحققش 100000دولار ولكنه حقق 90000 دولار فقط ... وده لأن ربنا مارادش انه يحقق المبلغ كامل أو يمكن لأن سعيه ماوصلش لدرجة إنه يستحق تحقيق المبلغ ده!

صح ولا لأ؟؟

العلماء كانوا زعلانين أوي من حتة تعظيم الانسان وأنه فعال وقدراته جبارة ... ومش فاهم ليه زعلانين إن ماينفعش الانسان يتقاله انه عظيم وعقليه جبارة وجواه طاقة عظيمة من صنع العظيم الله سبحانه وتعالى؟؟

ايه المشكلة؟

ده العقل لوحده زي ماقلت إن المستغل منه 5% فقط؟؟

زعلانين برضة من موضوع إن علاج المرض مش في الادوية ولكنه بالارادة ودي حقيقة فعلا بإن جهاز المناعة معجزة الخالق عز وجل مخلوق ليواجه أي نوع من أنواع المرض مهما كان وقدرة الانسان وارادته بتتحكم في مدي دفاع جهاز المناعة ضد المرض وعلى فكرة الحالة المزاجية للانسان بتفرق في علاج المرض وحتى مع وجود ادوية خارجية ودي حاجة معروفة وعن تجربة شخصية.
زعلانين ليه بقى من نموذج الشخص إلي حصله حادثة سقوط طائرته وحصله تهتك في الحجاب الحاجز وكسور في العمود الفقري وغيره، وخلاص بقى شبه ميت، ومجرد إن ارادته خلته يصمم على الخروج على رجليه صحيح على عكاز بس هو صمم وقدر إنه يقف تاني ومن غير عكاز بعد فتة بل وحصلت المعجزة وقدر بفضل الله إنه ياكل طبيعي!


السر مش قانون الانجذاب ولكنه الارادة

قانون الانجذاب مجرد مقالات معنونة بشكل جميل وجذاب للارادة البشرية وقدرتها على التغيير، صحيح في العنونة دي مخالفات شرعية وصحيح العلماء طالما حاجة فيها شبهه وغلط يبقى نبعد عنها تماما ولكن في نفس لازم نوضح للناس دي ليه بتتحقق.



العقل البشري مش بيعرف الفشل ولكن بيوصل الانسان للنجاح

لو انسان ناجح فانه بينجح انه يكون ناجح طالما مصمم على النجاح

لو انسان فاشل فانه بينجح انه يفضل فاشل علشان هو مصمم على الفشل
هي دي حقيقة السر