الموت على الطريقة المصرية
عاوز تموت شهيد
يا تركب قطر ... يا تركب عبارة ... يا تركب طيارة
عاوز تموت م الجوع
ياتشتري شقة بالقسط ... ياتشتري عربية بالقسط
يا تدخل عيالك مدرسة خاصة
عاوز تموت مشهور
ياتتجوز رقاصة ... يا تنصب على بنك
عاوز تموت مليونير
ياتعمل فيديو كليب ... يا تلعب كورة
عاوز تموت ورا الشمس
ياتشغل مخك ... يا تفتح بؤك
عاوز تموت م الحزن
ياتحط الحكومة ف بالك ... يا تطالب بحقك
عاوز تموت م الضحك
يا تسمع تصريحات وزارتا الصحة والتعليم
يا تروح تتطعم من أنفلوانزا الخنازير
عاوز تموت م الحسرة
ياتتفرج ع الفاترينات في ستى ستارز... ياتروح زيارة لمارينا
عاوز تموت م الغيظ
ياتتفرج ع القنوات المحلية ... يا تتفرج على النشرة الجوية
عاوز تموت م الزهق
ياتستنى الإشارة لما تفتح ... ياتستنى دورك في التأمين الصحي
ياتستنى دورك في فرن العيش
عاوز تموت م الهبل
يا تسمع تصريحات المسئولين بعد كل كارثة
يا تتفرج على برامج المسابقات
عاوز تموت مخنوق
ياتروح مصلحة حكومية ... يا تقرأ الجريدة اليومية
عاوز تموت م الخضة
يا تركب ميكروباص .. يا تعدى الشارع على رجليك
عاوز تموت مرعوب
ياتستنى نتيجة الثانوية العامة
ياتستنى نتيجة التحاليل عند الدكتور
عاوز تموت ف حالك
أعمل نفسك دايما... مش واخد بالك
عاوز تموت من الاهمال
إعمل أي عملية في أي مستشفى حكومي
عاوز تموت منتحر ومكتئب
روح اخطب وانتا عندك 30 سنة ومرتبك 500 جنيه
عاوز تموت من الوطنية
روح شجع المنتخب ومعاك نجوم الفن والاعلام
عاوز تموت من الحزن على كرامتك
روح اشتغل في أي دولة عربية
ليست هناك تعليقات:
إرسال تعليق