الفكر المصري المتعفن (كليات القمة)

طبعا نظرا للفكر المصري العبقري وعلشان احنا حاليا نعتمد على صناعة المصطلحات فقط في هذا العصر. يعني بنحب نقول كلام كبير وخلاص ومصطلحات كبيرة على الفاضي وعلى المليان "طبعا دع علشان الناس ماتفهمش حاجة وهو ده المطلوب".

ظهر مصطلح اعتقد ان السبب الرئيسي في تخلف هذه البلد وظهور كل المشاكل النفسية لكل الطبقات الاجتماعية. هما صحيح 10 حروف بس أنا شايف انهم كانوا افتك من 10 قنابل نووية!

كليات القمة

يعني أيه كليات القمة؟

يعني طب وهندسة وصيدلية!

أيه الخيابة دي؟ معنى كدة إن في كليات القاع؟!

مع الأسف الشديد بقى الولد أو البنت من يوم مايتولدوا، بيتحكم عليها لازم يتشقلبوا ويمشوا على الحيطة علشان يدخلوا كلية من كليات القمة "على حد تعبيرهم"!

ولو حصل ومحصلش توفيق وممكن يكون زي مابيحصل كتير مايحصلش نصيب على نصف درجة مثلا! يبقى خلاص الولد أو البنت دول ضاع مستقبلهم وتتغير النظة ليهم لمجرد إنهم دخلوا كلية من كليات القاع!

حاجة تضحك ... صح؟

لأ هي تبكي ... وياما بكت ناس ... وجابت عقد نفسية لناس كتيييييييييييييييييييييييييييييييييييييييييييييرة

للأسف الناس كدبت الكدبة وصدقتها والنتيجة مثلا أن كلية زي تجارة أو حقوق أو زراعة على سبيل المثال، قليل جدا إلي بيدخلها لرغبته فيها وبالتالي بيبقى ايح مش طايق نفسه ولا الكلية ولا عنده استعداد يعمل أي حاجة وكفاية بقى كمان بصة الأهل إلي كلها حسرة على ابنهم أو بنتهم إلي ضاع مستقبلهم علشان مادخلوش طب أو هندسة!

مالها حقوق يعني؟ دي كانت كلية قمة القمم كلها في العصر الذهبي لمصر في العصر الحديث في أوائل القرن العشرين! دلوقتي ايه إلي خلاها قاع؟؟

مالها زراعة؟ يعني كلية زراعة مع انها بالتفكير الآدمي العادي مش بالتفكير المصري هنلاقي انها واحدة من قمم القمم.

والله كله قمم القمم

ولكن الفكر عندنا بقى رمة الرمم ووصل لدرجة التعفن

اي بلد علشان تقوم ويكون فيها نهضة، أكيد مش لما تكون كلها دكاترة بيمصوا دم الغلابة ولا كلها مهندسين نصابين ولا محاسبين مرتشيين ولا محامين معدومي الضمير!

ولكن لما يبقى في تباين في كل الوظائف ... لازم يكون في دكاترة ومهندسين ومحامين وقضاة ومحاسبين وعمال وفلاحين والأهم مدرسين!

لازم التعليم يبقى مش بس كليات، لازم تعليم فني وصناعي، وده الطبيعي!

المصطلح ده عمل فجوة في المجتمع وخلي إلي بيدخل كلية قمة "على حد تعبيرهم" أحسن من بيدخل كلية تانية لأن التاني من المفترض أنه فاشل، ولازم أي حد يشوف من كليات القاع دي "على حد تعبيرهم" بيتخيل انهم قاعدين فاضين مش بيعملوا حاجة!

حد يقدر يقولي ... مين الأهم؟

عامل الخراطة ولا السواق ولا المهندس؟!

أنا كدة خلصت الموضوع ولكن في حاجة مش عارف تتقال ولا لأ، لأن مش كل الناس بتؤمن بنظرية المؤامرة ولكن أنا من المؤمنين بيها "من فترة قريبة" وهنلاقي لما نخلي كلية حقوق إلي خرجت زعماء وثوار كلية ملهاش لازمة يبقى أكيد في مؤامرة! لما كلية زراعة ملهاش لازمة؛ لازم يكون في مؤامرة! لما البلد مايبقاش فيها غير دكاترة ومهندسين بس وياريتهم عدلين؛ لازم يبقى في مؤامرة!