شركة أبو قير للأسمدة مؤتمر تكنولوجيا معالجة المياه الثامن والعشرين فندق الفور السيزون بسان ستيفانو - الأسكندرية - مصر موقع المؤتمر
الحمد لله وبتوفيق ربنا ... شاركت للمرة الثانية في مؤتمر وفي فترة مش كبيرة (تقريبا خلال شهرين) والحقيقة الحمد لله إن المؤتمرين كانوا مؤتمرات كبيرة وليها أهميتها وناجحة سواء على المستوى الأقليمي أو الدولي.
طبعا أول مؤتمر شاركت فيه كان المؤتمر الدولي الرابع عشر لتكنولوجيا المياه وإلي شاركت فيه كمنظم وكممثل لشركة مشاركة في المعرض وكمحاضر بأسم الشركة في احدى ورش العمل.
المؤتمر التاني وإلي بجد بجد أنا مش مصدق إني حضرت وشاركت في مؤتمر بالشكل الفعال والمنظم إلي شفته في مؤتمر تكنولوجيا معالجة المياه الثامن والعشرين وإلي بتنظمه سنويا شركة أبو قير للأسمدة.
على مستوى الأستفادة الشخصية ... أنا يمكن مااستفدتش من المؤتمر غير كوني مستمع أكتر ... وده طبعا كافي جدا ومعنديش اعتراض ولكن يمكن الفرصة ماسنحتش ليا إني أكون في موضوع مسئولية عن معرض الشركة في المؤتمر وبالطبع كنت بأستمع لكل المناقشات إلي كانت بتتم في معرض الشركة في كل مجالات الصناعة إلي مهتمة بعملية معالجة المياه والصرف الصحي والصناعي وأيضا إعادة تأهيل الوحدات القائمة.
على مستوى نجاح شركتنا في المؤتمر ... أعتقد أننا كنا من أكثر الشركات إلي عملت سمعة طيبة وصدى كويس وسط المشاركين والزائرين.
يمكن أنا فشلت في المؤتمر في نقطة إني أكون علاقات خاصة بيا أنا
مش عارف ليه مكنش عندي الحافز إني أعمل كدة على الرغم إني كنت عامل زي نطاط الحيط في المؤتمر إلي فات ... بس المرة دي مكنش عندي أي حافز ومش عارف السبب بصراحة.
بس المهم برضة إني استفدت والحمد لله زي ماقلت اتعرفت على أوضاع مصانع كتيرة وشركات ومشاكل الصرف الصناعي عندهم وغيرها من المشاكل التقنية.
بما إني الحمد لله وكالعادة سبع صنايع ... الحمد لله ربنا وفقني وعملت كل المطبوعات الخاصة بالشركة عدا الكتالوج.
المهم دي بعض الصور من المعرض
السيد نائب محافظ الأسكندرية والسادة المسئولين الزوار يفتتحون المعرض
أنا الاسم باللغة العربية يمكن تقيل شوية بس ده أكيد مش لضعف في اللغة العربية ولكن أكيد لضعف في المتحدثين بيها وده طبعا علشان احنا بلاهوية؛ بلا معنى؛ مالناش أي لازمة في كوكب الأرض. مش ده موضوعنا وأنا مش هأوضح معنى الاسم ولكن أفضل أقول استخدامه وهو:
Real World Modeling
يعني ايه؟
معناه إننا بنعمل محاكاة للعالم الحقيقي في البرمجة. يعني ببساطة بأخلي البرنامج عبارة عن مجموعة كائنات متصلة ببعضها، كل كائن ليه مجموعة من الخصائص والوظائف إلي بيقوم بيها وأيضا مجموعة من الأحداث إلي بتـؤثر في الكائن ده.
الحقيقة في نوعين من البرمجة:
البرمجة الإجرائية Procedural Programming.
البرمجة الكائنية التوجة OOP .
البرمجة الإجرائية وإلي هي عبارة عن مجموعة أوامر مرصوصة تحت بعض ومرتبطين ببعض. ويمكن إحنا لما كنا في الكلية في قسم ميكانيكا، مكناش نعرف الفرق بين الاتنين وده طبعا لأننا مش متخصصين ومحتاجين البرمجة في بعض العمليات الحسابية المعقدة ولكن وإحنا في الفرقة التانية كنا بندرس لغة C ولكن كان مكتوب على الكتاب Programming Using C/C++ وفضلنا معتقدين إن لغة C++ نسخة متقدمة من C وإن الاختلاف في بعض الأوامر.
ولكن يمكن علشان أنا بأحب البرمجة وقرأت فيها شوية عرفت إن اللغتين مالهمش دعوة ببعض، ده روسي وده عبري وإن لغة C لغة تقليدية أو اجرائية ولغة C++ لغة كائنية التوجة؛ بل من أقوى اللغات كائنية التوجة.
اللغات الإجرائية أو التقليدية زي CوFORTRAN 77وPascalوBasicواللغات الكائنية التوجة زي C++وزي C#وVB.Netوايضا لغة FORTRAN 90تدعم بعض خصائص البرمجة كائنية التوجة!
بالنسبة للبرمجة الكائنية التوجة فهي ليها بعض المعالم إلي بتدعمها وهي:
الوراثة Inheritance.
التغليف Encapsulation.
تعدد الواجهات Polymorphism.
وبالطبع كل المعالم والعمليات دي بتتم من خلال الكائنات
يعني أيه كائن؟
يعني أنا، يعني سيارة، يعني كتاب، يعني كرسي، يعني تليفون ... يعني أي شئ ليه خضائض معينة وبيقوم بوظائف محددة.
يعني ايه الكائنات مرتبطة ببعضها؟
يعني دلوقتي "أنا" أو أي حد عبارة عن "كائن" والسيارة والكرسي والكتاب كائن، علاقتي بيهم أيه؟
أنا باقود السيارة وعن طريق بعض الوظائف إلي بأقوم بيها اثناء القيادة؛ هي بالتالي بتقوم ببعض الوظائف الخاصة بيها.
وهكذا بالنسبة للكائنات الاخري
في حاجة تانية، لو أنا وأخويا وابن عني وبنت عمتي وشوية ناس تانين معرفهمش ... أي حاجة
أيه إلي احنا بنشترك فيه؟
بنشترك في اننا بني آدمين
لينا عنين بلون معين
شعر بلون وشكل معبن
والطول كذا
وهكذا
يعني دلوقتي أنا كائن من فئة البني آدمين وقيم خصائص الفئة دي بالنسبة لي مختلفة، ولابن عمي مختلفة، ولخطبيتي مختلفة وهكذا.
ازاي الشكل ده بيتم؟
فئة البني آدمين
بني آدم.الطول
بني آدم.لون العنين
بني آدم.لون الشعر
بني آدم.شكل الشعر
...
...
...
وبيقوم بوظائف معينة:
بني آدم. مشي
بني آدم.جري
بني آدم.ضحك
وهكذا
باختصار الخصائص عبارة عن صفاتوالوظائف عبارة عن أفعال
وطبعا ده بيطبق على كل الكائنات.
كدة إحنا وضحنا بالبلدي كدة معنى كائن وفئة.
يعني إيه وراثة؟
يعني وراثة ... مش محتاجة شرح!
لأ محتاجة شرح طبعا، وهي إن في لو عندي كائن ضمن فئة معينة وليه بعض بعض الخصائص والوظائف إلي موجودة في فئة تانية.
هل أقوم بتعريف الفئة مرة أخرى وأكبر حجم البرنامج؟
لأ ... خاصية الوراثة بتخليك تاخد الخصائص والوظائف إلي انت عايزها وتضيف إلي انت عايزه.
مثلا فئة البني آدمين
لو عملنا ليها وراثة لفئة جديدة للمواطن المصري مثلا:
أكيد هناخد خصائص ووظائف البني آدمين، مع إضافة خصائص خاصة بالمواطن المصري زي الكرش وخشونة المفاصل وضعف النظر والذاكرة من كتر الــ ...... غير فيروس سي والفشل الكلوي والسرطان والتشكيلة الحلوة إلي عندنا.
مع إضافة بعض الوظائف إلي مش بيعملها غير المواطن المصري ... زي شرب الحشيش، وبص الولاد على البنات ورسم البنات على الولاد.
والأحداث إلي بتتم على المواطن المصري ... زي النصب عليه وضربه على قفاه وتعذيبه في دنيته وفي مرضه وحتى في آخرته.
الخاصية التانية للبرمجة الكائنية التوجة وهي التغليف:
يعني إيه؟
أنا قلت إن البرمجة الإجرائية عبارة عن أوامر تحت بعضها ومرتبطة ببعضها ولكن البرمجة كائنية التوجة عبارة عن كائنات مستلقة، فلو قمت بتغيير خصائص أو وظائف كائن معين، مش هيأثر في الكائنات التانية.
ودي بيخلي عندنا ميزة اسمها امكانية إعادة الاستخدام للفئات أو الكائنات لأانها مش مرتبطة أو معتمدة على حاجاة تانية، ولو أي حاجة اتغيرت مش هتأثر في حاجة.
مثلا الفئة بتاعت المواطن المصري، كل الفئات بتاعت كل المواطنين التانين بتتغير في خصائصهم ووظائفهم وشكلهم بدون الـتأثير في الفئة بتاعت المواطن المصري ... إحنا زي ماحنا.
تالت خاصية، وهي تعدد الواجهات
وتعني استخدام حاجة واحدة بنفس الاسم في أكتر من حاجة، يعني على سبيل المثال لو مثلا عندي عنصر من عناصر برنامج وعايز اعمله محاذاه ... ممكن استخدم المحاذاة دي على كل العناصر مهما كانت رغم اختلافها.
في النهاية هنلاقي ... إن البرمجة كائنية التوجة معمولة علشان تسهيل البرمجة وإنها تكون محاكاة للعالم الحقيقي وأيضا لتصغير حجم البرنامج وامكانية الإضافة والتعديل دون تأثر البرنامج.
الحقيقة أنا مبهور بأسلوب قنوات الحياة التسويقي وعلشان كده كتبت الموضوع ده
قنوات الحياة في الحقيقة مش بتعتمد على الاعلانات فقط في تمويل القناة وتشغيلها
ولكنها عملت حاجة ... نقدر نقول عليها إنها ضربت عصفورين بحجر واحد
كسبت نسبة مشاهدة عالية جدا وأصبحت تقدم مجموعة من البرامج التي اكتسبت نسب مشاهدة عالية جدا
وأيضا استخدمت نسب المشاهدة العالية والاقبال الجماهيري كأسلوب جديد لتمويل القناة عن طريق الاتصالات والمسابقات التي تقدمها القناة
حتى في البرامج العالمية التي قامت القناة بإنتاج النسخة العربية منها
قامت القناة بتمصير هذه البرامج واستخدام أسلوب المشاركة وعمل المسابقات من خلال هذه البرامج
على سبيل المثال
برنامج أرض الخوف والذي يعتبر أولى البرامج التي تم عمل العديد من المسابقات خلال 14 أسبوع، وتم استقبال آلاف المكالمات الهاتفية من المعجبين بالمتسابقين وأيضا الاتصالات والرسائل للمشاركة في المسابقات
أيضا برنامج لعبة الحياة والذي تستقبل القناة أيضا آلاف المكالمات للمشاركة بالبرنامج والمكالمات والرسائل للفوز بنصف المبلغ الذي ربحه المتسابق
ولا ننسى أبدا برامج الطبخ مثل سفرة دايمة والمطبخ والتي تتمتع بنسبة مشاهدة عالية جدا ومشاركة جماهيرية كبيرة
طبعا أنا مش بأحسد ولا حاجة
ولكن أنا حبيت أسجل اعجابي بأسلوب القناة التسويقي وقدرتها على التمويل واكتساب جماهيرية كبيرة في نفس الوقت
بالطبع أنا لست على علم بشئون القناة الإدارية الداخلية ولكن أنا كمشاهد عادي أحكم على النتيجة، والنتيجة تدل على إدارة ناجحة استطاعت استغلال كل الموارد المتاحة لتسويق وتمويل مجموعة قنوات الحياة
في عام 1898 كتب Morgan Robertson رواية بعنوان Futility (The Wreck of the Titan) ومعناها العبث (حطام المارد) وإلي اتكلم فيها عن غرق اضخم سفينة في العالم وإلي سماها Titan في شمال الاطلنطي بعد اصطدامها بجبل جليدي.
الحقيقة دي حاجة غريبة جدا لأان بعد 14 سنة من كتابة الراوية دي ... غرقت أضخم سفينة عرفها الانسان حتى ذلك التاريخ؛ السفينة الأسطورة والأشهر على الاطلاق RMS TITANIC وإلي غرقت في شمال الاطلنطي بعد اصطدامها بجبل جليدي!
15 ابريل هو الذكرى السنوية لغرق الباخرة الأسطورة الأشهر على الاطلاق ... RMS TITANIC
علشان يبقى كلامنا صحيح
RMS TITANIC اتصدمت بجبل جليدي يوم 14 ابريل 1912 الساعة 11:40 مساءا وغرقت تماما الساعة 2:20 صباحا يوم 15 ابريل 1912
ايه ده؟
كل شوية RMS TITANIC ... يعني ايه RMS؟
لكل سفينة اسم بادئ أو Prefix؛ الاسم ده بيدل على مهمة السفينة أو طبيعة عملها
RMS معناه Royal Mail Steamer وده بيطلق على السفن إلي بتنقل رسائل ملكية بناء على عقد
RMS TITANIC كانت مملوكة لشركة White Star Line الانجليزية وتم بناء السفينة في ايرلندا وبايدي ايرلندية
يمكن لحد دلوقتي ماقولتش حاجة جديدة
ولكن يمكن إلي مش كتير يعرفوه هو إن TITANIC كان ليها اخوات!
أول اخت وإلي كانت توأم RMS TITANIC واتبنت معاها جنبا إلى جنب في بلفاست بايرلندا كان اسمها ... RMS Olympic
الملاحظ إن كان ليها نفس الاسم البادئ
الأخت التانية ... ولكنها مش توأم لأنها اتبنت بعدهم، كان اسمها ... HMHS Britannic
طبعا الاسم البادئ مختلف وبالتالي فإن مهمة السفينة كانت مختلفة
HMHS معناه Her Majesty's Hospital Ship
ودي كانت عبارة عن سفينة علاجية ... مستشفى ... انقاذ وكانت بتستخدم في نقل المرضى والجرحى
RMS TITANIC مش مجرد باخرة اشتهرت بغرقها في أول رحلة ليها مع أن اطلق عليها أنها غير قابلة للغرق؟؟
لكن وراها قصة كبيرة ... حلم
إذا كانت RMS TITANIC الباخرة الأشهر على الاطلاق لضخامتها وفخامتها ... وأيضا لغرقها في اول رحلاتها
وراء هذه الشهرة شخص حلم من صغره انه يصمم ويبني سفينة غير قابلة للغرق
حلم المهندس Thomas Andrews مصمم السفينة وإلي كانت بالنسبة له حلم حياته
توماس اندروس ولد في 7 فبراير 1873 في بلفاست، ايرلندا.
في سن 11 سنة التحق بالاكاديمية الملكية في بلفاست وذلك في عام 1884 واستمر بالدراسة مدة 5 سنوات حتى عام 1889 ليبدأ حياته العملية في شركة Harland & Wolff Ltd. لبناء السفن.
دلوقتي هنتكلم عن حياته العملية في شركة Harland & Wolff Ltd.
قلنا من شوية انه خلص دراسته في الاكاديمية الملكية في بلفاست في سن 16 سنة وبعدها بدأ حياته المهنية. ولكنه في البداية بدأ بالتدريب في عدة اقسام ... كالتالي:
توماس اندروس بدأ بالتدرب لمدة ثلاثة شهور في ورشة التركيبات بالشركة
لمدة شهر في صناعة الكبائن
شهرين عمل على السفن
شهرين في المخزن الرئيسي للشركة
خمسة شهور عمل مع نجارين السفن
شهرين في صناعة وتشكيل الشرف الخاصة بالسفن
شهرين اخرين في طلاء السفن
ثماني شهور في تركيب الاجزاء الحديدية والمعدنية الخاصة بالسفن
ستة شهور في اعمال الاصلاح والصيانة
ثلاثة شهور في صناعة القوالب واعمال السباكة
ثماني شهور في الحدادة
18 شهر في الرسم والتصميم
وظهرت موهبته وبراعته في الرسم الميكانيكي والتصميم والرسم المعماري
الخاص بالسفن، ولفت الانظار داخل الشركة وتوقع الجميع له مستقبل باهر في مجاله وانه
سوف يصبح ذو مكانه في الشركة ربما ان يصبح مديرا لها بل وشريكاً في يوم من الايام!
توماس اندروس اصبح عضوا في مؤسسة الانشاءات البحرية والهندسة المعمارية في عام 1901
وبعد عمله داخل العديد من الاقسام في العديد من التخصصات اصبح المدير العام للشركة ومدير قسم الرسم والتصميم.
الحقيقة توماس آندروس كان ليه الدور الأكبر في ارتفاع عدد الضحايا وعد القدرة على انقاذهم وده يرجع لأنه لم يتم تزويد الباخرة بالعدد الكلي لمراكب الانقاذ ويتم تزويدها فقط بنصف العدد وده بسبب الاعتقاد بأن الباخرة غير قابلة للغرق.
شخصية تانية مهمة جدا في قصة RMS TITANIC وهي قبطان الباخرة
Captain Edward John Smith
الجميل ان القبطان سميث كان هو قبطان توأم RMS TITANIC إلي هي طبعا RMS OLYMPIC
والرحلة الأولى للباخرة RMS TITANIC كان من المفترض انها تكون رحلة تقاعده ... وللاسف تقاعد القبطان سميث في مشهد درامي جدا وهو في قمرة القيادة مع RMS TITANIC
دلوقتي عايز اعلق على القدرة المستخدمة لتشغيل RMS TITANIC
الطول: 269 متر
أقصى عرض: 28 متر
القدرة: 29 غلاية بخار تستخدم لشتغيل محركات ترددية بقدرة 30000 حصان وهذه القدرة تستغل لادارة عدد 2 رفاص جانبي (15000 حصان لكل رفاص).
تربينة بخارية ذات قدرة 16000 حصان تستخدم لإدارة الرفاص الموجود في المنتصف.
القدرة الكلية 46000 حصان وتساوي تقريبا 34 ميجا وات
وده يخليني أقول تعليق باقوله دايما وهو أن المفاعل النووي المصري غير قادر على تشغيل RMS TITANIC لأنه الطاقة الناتجة منه تساوي 22 ميجا وات فقط!
وده يخلينا نقدر قد ايه RMS TITANIC كانت عملاقة وقد ايه كانت بتستهلك كمية من الفحم.
بالنسبة لأخوات RMS TITANIC
RMS OLYMPIC فانها خدمت لمدة 24 سنة وبعدها خرجت من الخدمة
HMHS BRITANNIC فإنها كان ليها نهاية مؤلمة زي RMS TITANIC لأنها غرقت بعد انفجارها بلغم بحري بعد أن خدمت لمدة سنة تقريبا
عايز أقول إن ده موضوع عزيز عليا جدا ... لأنه مش موضوع عادي ... ولكن ممكن اقول عليه مجازا انه بحث
أنا مش عارف ليه حابب اني أعمل الموضوع ده في نفس الوقت من السنة ... والمرة دي هي المرة الثالثة على التوالي
والحمد لله أفتكر ان كل مرة بياخد شكل مختلف في ترتيب المحتويات والأفكار ... على الرغم ان طبعا أول مرة كانت الأغلى عندي لأنها كانت مفصلة في شكل عدة حلقات
قال رسول الله صلى الله عليه وسلم إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له
صدق رسول الله صلى الله عليه وسلم
أنا مش هأدخل في شرح الحديث لأنه واضح وصريح
أنا عن نفسي واحد من الناس أتمنى إني احقق أي حاجة من إلي تناولها الحديث الشريف
مين يكره انه يفضل عايش بعد مايموت
بس مش هي دي المشكلة
المشكلة إني لاقيت إعلان صريح للمتاجرة باسم الله
الإعلان بيبدأ بحديث شريف
وإلي بيتكلم في الاعلان عامل فيها سعودي ... أو هو سعودي ... مش هتفرق
أو كمالة نصب ومتاجرة باسم الله
هو ده الإعلان ... شوفوه وبعدين نتكلم
يعني أيه اعمل إعلان وأقول للناس تعالوا اشتروا علشان ترضوا ربنا؟
أو موضوع الراجل السعودي أو إلي عامل فيها سعودي ده ... كتر أوي وبقت قلة أدب واستخفاف بعقول الناس
قال يعني لما يتكلم باللكنة دي ... هيستفيد ايه
مش فاهم؟
المهم سكتنا على المسابقات الهبلة إلي بيقولوا مسابقات دينية
وسكتنا على الطريقة إلي بيعملوا بيها الاعلانات
لكن مش لدرجة إني احط حديث في بداية إعلان وأتاجر باسم الله
